גאולה

אִמְרוּ, בְּנֵי אֱלֹהִים, בַּמָּה / אֶתֵּן לְפוֹעֲלִי

חֶסֶד? וְאִם אֲנִי מִכֶּם – מַה / לִּבְנֵי שְׁאוֹל וְלִי?

בִּינִי, נְוַת אֱמוּנוֹת, כִּי שָׁוְא / חֶלֶד וְיוֹשְׁבָיו,

וּבְהוֹן וֹמַחֲמַדִּים מוֹקְשָׁיו / יַצִּיב לְאוֹהֲבָיו.

אִם תִּדְבְּקִי בְּאֵל וּקְדוֹשָׁיו / לִמְאֹס בְּעוֹזְבָיו –

הֵאָחְזִי בְסֻלַּם חָכְמָה, / תֵּרְדִי וְתַעֲלִי;

מִמֵּךְ וּבָךְ בְּאֵר לִמְזִמָּה, / תִּדְלִי בְּלִי דְלִי.

רֵאשִׁית הֱיוֹת יְסוֹדֵךְ צוּרֵךְ, / וַתִּכְסְפִי אֱלֵי

פֹּעַל, וְלַעֲשׂוֹת כָּל צֹרֶךְ / לָךְ נִתְכְּנוּ כְּלֵי

גֵוֵךְ; וְהֵן קְחִי לָךְ דֶּרֶךְ, / בָּהּ תַּעֲלִי אֱלַי

צוּרוֹת אֱמֶת, בְּלִי גֵו הֵמָּה, / עוֹשׂוֹת בְּאֵין כְּלִי –

אוּלָם יְחַשְּׁבוּ כִּי שָׁמָּה / כָּל יֵשׁ בְּלִי כְלִי.

הִתְאַזְּרִי, כְּלוּלָה, כֻּלָּךְ / לִשְׁמֹר וְלַעֲבֹד

גַּן תַּעֲנוּג אֲשֶׁר נִתָּן לָךְ; / בּוֹ תֶחֱזִי כְּבוֹד

הָאֵל; וּמַאֲסִי גֵו יֻשְׁלַךְ / בַּבּוֹר, וּבַאֲבֹד

עַצְמוֹ וְשָׁב בְּשָׂרוֹ רִמָּה – / הֶבֶל תְּכַלְכְּלִי!

אִם אֵין בְּיַד סְעִיפֵךְ אַשְׁמָה – / רֹנִי וְצַהֲלִי!

מָעוֹן, אֲשֶׁר בְּיָדוֹ רוּחִי – / אֵלָיו אֲשַׂבְּרָה.

הוּא יַחֲקֹר וְיֵדַע שִׂיחִי / אִם לֹא אֲדַבְּרָה.

אֶתְאַזְּרָה כְּפִי כָל כֹּחִי, / יוֹם יוֹם אֲעוֹרְרָה.

כִּי אֶעֱבֹר נְתִיבֵי עָרְמָה – / שָׁלוֹם בְּאָהֳלִי

יִהְיֶה, וְלִי יְצַוֶּה עָצְמָה / צוּרִי וְגוֹאֲלִי.