סימן: משה
אֱלֹהֵי תְהִלָּתִי / מֵאַיִן בְּרָאתָנִי
וּלְהָמִית תַּאֱוָתִי / בְּעוֹלָם הֶחֱיִיתָנִי
אֶדְאַג מֵחַטָּאתִי / יוֹם לְמִשְׁפָּט קְרָאתָנִי
אֵלִי, זְכָר-נָא כִּי / כַחֹמֶר עֲשִׂיתָנִי:
איו' י, ט
מַה בֶּצַע בְּדָמִי / אִם יֶחֱרֶה אַפֶּךָ
וּמָה אוֹעִיל בְּמוֹתִי / אִם יַעֲלֶה קִצְפֶּךָ
וּמִי אֲנִי עַד יִסְעַר / עָלַי יַם זַעְפֶּךָ –
הֲטוֹב לְךָ כִּי תִמְאַס / אֶת יְגִיעַ כַּפֶּיךָ?
פַּחַד הֶעֱטִיתַנִי / וְזַעַם מִלֵּאתָנִי:
ירמ' מו, יז
שַׁדַּי, צָמְאָה נַפְשִׁי / וְכָמַהּ לְךָ בְּשָׂרִי,
כִּי רָדַפְתִּי שְׁרִירוּת / לִבִּי וְחֵפֶץ יִצְרִי
מָתוֹק מִדְּבַשׁ מְצָאתִיו / אֲבָל הוּא עַז מֵאֲרִי,
גָּדַר דַּרְכֵי שִׂכְלִי / וְהִבְאישַׁנִי לְיוֹצְרִי –
אֲהָהּ, יִצְרִי, עֲכַרְתַּנִי / וְלָרִיק פִּתִּיתָנִי:
הֲיִנָּצֵל אֱנוֹשׁ מִיַּד / מָוֶת בְּעֹשֶׁר וְקִנְיָן
וְיָשִׁיב הַיּוֹם הַמָּר / בְּחֵץ חֲנִית וְשִׁרְיָן –
אִם לֹא יִמְצָא אֹמֶר / בְּחִכּוֹ וּבְפִיו עִנְיָן
יוֹם יַעֲמֹד לַחֶשְׁבּוֹן / וְהוּא הָעֵד וְהַדַּיָּן?
אוֹדֶה כִי שְׁפַטְתַּנִי / וּבְצֶדֶק עֲנִיתָנִי:
תה' קיח, כא
רַחוּם אֲשֶׁר עַל חֶטְאִי / וַעֲוֹנִי לֹא גָמָל
הַבֵּט כִּי אֱנוֹשׁ בְּתֵבֵל / לְכַעַס יֻלַּד וְעָמָל
וְהוּא כַחֲצִיר גַגּוֹת / אֲשֶׁר לֹא צָץ וְלֹא גָמָל
יִיבַשׁ כְּעֵשֶׂב שָׂדֶה / כְּצִיץ יָצָא וַיִּמָּל
וִיבַשֵׂר כִּי רְצִיתָנִי / וּמִיַד שְׁאוֹל פְּדִיתָנִי:
שם מט, טז