לְבָבִי מְאֹרָעָיו בְּזָכְרוֹ וּמִבְחָנָיו
וְדָתֵי תְלָאוֹתָיו אֲשֶׁר הֵם מְזֻמָּנָיו,
וְעֹשֶׁק זְמַנִּי לוֹ אֲשֶׁר יַעֲשֶׂה עִמּוֹ
בְּכָל-יוֹם לְהַשְׁכִּילוֹ בְּאֵיבָה כְמַשְׂטִינָיו,
בְּאָכְלוֹ כְמוֹ אַרְבֶּה לְשֵׂאוֹ וְהוּא נִרְעָב
לְעֻמּוֹ וּבַנִּשְׁאָר יְבַקֵּשׁ נְתֹן עֵינָיו;
חֲדַל לָךְ לְבָבִי, אַל תְּדַבֵּר כְּזֹאת, וּפְצֵה
אֱמוּנָה, וְאַל תִּירָא, וְשַׁמַּע בְּקוֹל אָזְנָיו.
הֲתָשִׂים לְבָבָךְ אֶל זְמַן רַע אֲשֶׁר לַחְמוֹ
מְמֻלָּא מְרֹרוֹתָיו, וְרוֹשׁוֹ – מְסַךְ יֵינָיו,
מְדַבֵּר וְאֵין מֵקִים, וְנוֹדֵר וְיֵשׁ עִתּוֹת
מְשַׁלֵּם, וְאֵין דָּבָר מְדֻבָּר עֲלֵ[י] אָפְנָיו?
וּמִי זֶה אֲשֶׁר יִבְטַח עֲדֵי כִי יְהִי נִסְמָךְ
עֲלֵי זֶה, וְיַעְזֹב צוּר וּמִשְׁעָן לְנִשְׁעָנָיו?
[לְהַ]שַּׂר אֲבִי אִסְחַק, גְּבִירִי, אֲשֶׁר נוֹדַע
בְּאַפְסֵי אֲרָצוֹת עִם רְחוֹקִים כְּבִשְׁכֵנָיו,
בְּחֶסֶד וְיִרְאַת אֵל וְשׁוֹעַ וּפִתְחוֹן כָּף
וְשֵׁם טוֹב וּמַעַשׂ טוֹב, אֲשֶׁר הוּא יְסוֹד בּוֹנָיו.
מְאַחֵז שְׁבִיל יֹשֶר וְהוֹלֵךְ נְתִיב כֹּשֶׁר
וְהַטָּס כְּמוֹ נֶשֶׁר בְּחֶפְצוֹ וּבִרְצוֹנָיו,
וְיָרֵא מְכַבֵּד אֶת-יְרֵאָיו, וּבַר לֵבָב
נְקִי כָף, שְׁפַל רוֹחַ, וְעָנָיו כּמוֹ עָנָיו;
אֲשֶׁר חָס עֲלֵי עַמּוֹ בְּשׁוּרוֹ רְפוּת יָדָיו
וְהָיָה כְמִגְדַּל עֹז לְדַלָּיו וְאֶבְיוֹנָיו.
עֲשִׁירָיו כְּמוֹ אָבִיו יְכַבֵּד וְגַם אִמּוֹ,
וְיַחְמֹל עֲלֵי דַלָּיו – חֲמֹל אִיש עֲלֵי בָנָיו.
יְסוֹכֵךְ בְּאֶבְרָתוֹ עֲלֵיהֶם, עֲדֵי יֹאמַר
נְשִׂיא עָם: וּמִי יִתֵּן הֱיוֹתוֹ כְמִסְכֵּנָיו.
נְדִיב לִב, אֲשֶׁר אֵין יָם בְּעֵת יֶהֱמוּ גַלָּיו,
וְלֹא מֵי שְׁחַקִים עֵת יְרִיקוּן, כְּמַתָּנָיו;
אֲשֶׁר אֵין בְּאוֹצָרוֹ מְסֻגָּר, וְלֹא חוֹתָם
בְּכִיסוֹ, וְלֹא אוֹמֵר בְּפֶה לֹ[א] בְקִנְיָנָיו.
מְכַלֶּה לְכָל-חֶדֶק מְחַזֶּק יְדֵי בֶדֶק
אֲשֶׁר בַּעֲשׂוֹת צֶדֶק זְמָמוֹ וְחֶשְׁבּוֹנָיו;
גְּבִירִי, בְּנוֹ נָתָן, אֲשֶׁר שָׂם עֲלֵי חָתָן
יְקָרוֹ בְּעֵת נָתַן גְּבִרְתּוֹ בְפִדְיוֹנָיו.
כְּבוּדָה, יְקָרָה, בַּת נְדִיבִים מְהֻלָּלָה,
אֲשֶׁר הִיא מְאַמֶּצֶת לְבַעְלָהּ עֲלֵי מוֹנָיו.
כְּמוֹ בָא לְשַׂמֵחַ לְבָבָם, יְשַׂמֵחַ
לְבָבוֹ אֱלֹהִים, גָּם יְהוֹסִיף עֲלֵי שָׁנָיו:
אֲדוֹנִי, לְנִכְחֶךָ עֲשׂה שׁיר נְכֹחֶךָ
אֲשֶׁר דָּת שְׁבָחֶיךָ קְלָאתוֹ וְהֶגְיוֹנָיו,
אֲשֶׁר זִכְרְךָ עַל פִּיו כְּנֹפֶת מְאֹד נִמְתַּק,
וְטוּב מִפְעֲלוֹתֶיךָ גְּלוּיָו וּמַצְפּוּנָיו.
מְאֹד יִתְמְהוּ עַמִּים בְּשׁוּרָם עֲלוֹ[ת שִׁ]ירִי
עֲדֵי עָב, וְרִדְתִּי לַאֲבַדּוֹן וּמִ[שְׁכָּנָיו],
וְהִנְנִי כְשִׁיר עוּגָב יְפֵה קוֹל וְטוֹב נַגֵּן,
וְשִׁירִי בְּיַד עֹשֶׁק זְמַנִּי וְעֶלְבּוֹנָיו,
כְּגִבּוֹר וְאֵין חֶרֶב בְּיָדוֹ, כְּאִלּוּ לֹא
גְּבִירִי, בְּנוֹ נָתָן, גְּדוּדָיו וְלִגְיוֹנָיו.
אֲקַוֶּה וְאוֹחִיל לוֹ, וְאִם יַעֲרָךְ-לִי צוּף
פְּעָמִים, וְרוֹשׁ פֶּתֶן פְּעָמִים בְּשֻׁלְחָנָיו.
וּמִי הוּא אֲ[שֶׁר] זָמַם דְּרֹךְ עַל פּנֵי אֶרֶץ
בְּרַגְלָיו, וְלֹא תִדְרֹךְ אֲדָמָה עֲלֵי פָנָיו.