כתובת: שירים שעשה המשורר הנכבד דון וידאל בנבנשת למשורר אנשלמה דאיפייארה במקום אלקניס
רוּחַ זְמִירוֹת נוֹסְסָה עָלֶיךָ / רוּחִי וְעַל מִי זֶה תְשַׁו כִּסְלֶךָ
הַיְחָבְרְךָ יוּבָל אֲבִי כָל תּוֹפְשֵׂי / כִנּוֹר וְאֶת כֵּלָיו יְהַנְחִילֶךָ
אוֹ אִם בְּנֵי אָסָף יְקִיצוּן מִשְׁנַת / עוֹלָם וְיַעַמְדוּ לְגוֹרָלֶךָ
אוֹ אֶל בְּנֵי קֹרַח לְחֶבְרָה תֶאֱרַח / וִידֵי יְדוּתוּן כּוֹנְנוּ כֵלֶיךָ
אוֹ יַד בְּנוֹ יִשַׁי בְכָל זֹאת הָיְתָה / עִמָּךְ וְדַרְדַּע יַעֲרֹךְ מִלֶּיךָ
אוֹ שִׁירְךָ אָמוֹן בְּחֵיק הֵימָן וּמִן / זִמְרַת זְמִירָיו מָן לְהַאְכִילֶךָ
אוֹ תוֹךְ נְוֵה אֵיתָן תְּשַׁו מוֹשָׁבְךָ / אֵיתָן וְטַל אוֹרוֹ יְהִי טַלֶּךָ
אוֹ אַהֲרֹן הָיָה נְבִיאֶךָ וְהוּא / הֵישִׁיר דְּרָכֶיךָ וּמַסְלוּלֶיךָ
אוֹ שֵׁם וְעֵבֵר קָבְעוּ מִדְרָשׁ בְּתוֹךְ / בֵּיתָךְ וְיִשָׂשׁכָר בְּאָהָלֶךָ
לֵב נַעֲנָה עַל מִי תְשַו מִבְטַחֲךָ / בִּשְׂאֵת זְמִירֶךָ וּבִמְשָׁלֶךָ
מִי אִתְּךָ כִּי תַעֲלֶה לִקְרַאת כְּרוּב/ מִמְשַׁח בְּתֻפֶּיךָ וּבִנְבָלֶיךָ
אוֹ מִי יְסִירָךְ לֵב כְּבַד פֶּה לֶאֱחֹז / בִּכְנַף חֲלִילֶךָ וְתוֹלָלֶיךָ
הַאִם לְנֹטַע הַזְּמִירוֹת תַּאֲמִיר / בִּנְטַע צְנִינֶךָ וְנַהְלוּלֶךָ
אוֹ אִם לְבוֹרֵא נִיב שְׂפָתַיִם שְׂפַת / כִּנּוֹר עֲרֵלָה נָהֲגָה דִגְלֶךָ
בִּנְעִים זְמִירוֹתָיו הֲיַשְׁגִּיחַ בְּבַת / קוֹל עִלְּגֵי שָׂפָה בְנֵי גִילֶךָ
בֵּין שַׁעֲטוֹת פַּרְסוֹת הֲמוֹנֵי מַרְכְּבוֹת/ שִׁירָיו הֲיִשָּׁמַע שְׁפַל קוֹלֶךָ
הַיְכַלְכְּלוּ קִירוֹת לְבָבָךְ נָעֳמוֹ/ בַהְמוֹן פְּרָטֶיךָ וּבִכְלָלֶיךָ
אוֹ עֵטְךָ יִמְשֹׁל בְּגֵאוּת יָם וְעַל / רֻכְסֵי זְמִיר יָרוּץ כְּאַיָּלֶךָ
שֵׁב שַׁח עֲרֵל שָׂפָה וְאַל תַּחְשֹׁב עֲלוֹת / אֶל בֵּין כְּרוּבֶיךָ וְחַשְׁמָלֶיךָ
וּבְאֶשְׁכְּלוֹת הַשִּׁיר רְעֵה עַל יָדְךָ / וּבְחֵיק נְגִינוֹת שֵׁב עֲדֵי גָדְלֶךָ
כַּזֶּה שְׂעִפַּי יֶהֱמוּ עֵת נוֹעֲצוּ / לַעְלוֹת שְׁמֵי הוֹדָךְ וּבִזְבוּלֶךָ
וַיִּבְחֲרוּ כִמְעַט דֳּמִי כִי יָרְאוּ / גַעַת בְּחוֹתָמָךְ וּבִפְתִילֶיךָ
כִּמְעַט לְשׁוֹן שִׁירִי לְחכִּי דָבְקָה / כִּי יָרְאָה מִלַּעֲמֹד אֶצְלֶךָ
וָאֶשְׁמְרָה עַד כֹּה לְפִי מַחְסוֹם עֲדֵי / נֶחְשַׁל לְבָבִי מִסְּבֹל עֻלֶּךָ
כִּי עַל פְּנֵי חוּצוֹת יְפוּצוּן מַעְיְנוֹת / שִׁכְלָךְ לְהַשְׁקוֹת כָּל בְּנֵי חֶדְלֶךָ
בָּאוּ עֲדֵי נֶפֶשׁ הֲמוֹן מֵי נוֹזְלֵי / שִׁירָךְ וְאֵיכָה תַעֲצֹר נוֹזְלֶיךָ
וַיְהִי לְבָבִי בִי סְחַרְחַר וַעֲלֵי / קֹטֶב זְמִיר יִסֹּב בגללך
וַעְצֹר בְּמִלִּין אֵיךְ יְכַלְכֵּל אִם תְּמוֹל / עָרְלַת לְשׁוֹנוֹ מָל בְּמִלּוּלֶיךָ
יִדְמֶה לְבָבָךְ יָם וּמִשָּׁם אֶמְשְׁכָה / נַחְלֵי זְמִיר וִיסוֹבְבוּ אֵלֶיךָ
עַל כֵּן לְבָבִי יַעֲלֹז כִּי הוּא כְבֵן / יוֹנֵק שְׁדֵי שִירָךְ וְכִגְמוּלֶךָ
לֵב נָד עֲלֹז וַחְדֵה רְאֵה נָפַל בְּתוֹךְ / חֶבֶל נְבִיאֶיךָ מְנַת חֶבְלֶךָ
שָׁלוֹם לְךָ אַל תֶּחֱרַד כִּי יַד אֲבִי / כָל נוֹגְנִים אִתָּךְ לְהַשְׂכִּילֶךָ
וּמְשׁוֹל מְשָׁלֶיךָ וְחוּד חִידָתְךָ / וַעְשֵׂה כְצִבְאוֹת שִׁיר בְּמִשְׁאָלֶיךָ
כִּי מִפְּאַת יִקְרַת שְׁלֹמֹה הַגְּבִיר / רוּחַ זְמִירוֹת נוֹסְסָה עֲלֶיךָ
סימן
מִי נָחֲךָ לִבִּי וּמִי יִשְׁבֶּךָּ / כִּי שׁוֹחֲרֶיךָ יֹאמְרוּ אַיֶּךָּ
לִמְצוֹא מְנוּחָה בֵית שְׁלֹמֹה רוּץ וּבֵין / שִׁירוֹ דְבָשׁ תִּמְצָא אֱכוֹל דַּיֵּךָּ.