ידידים יזמו מחר נסיעה / ר' משה אבן-עזרא
יְדִידִים יָֽזְמוּ מָחָר נְסִיעָה / שְׂאוּ־נָא אֶת־שְׁלוֹמִי אֶל־יְשׁוּעָה
שְׂאוּ מַשְׂאֵת לְבָבִי אֶל־שְׂרִיג חֵן / וְכַנַּת תֹּם עֲלֵי־מֵי־בִין נְטוּעָה
לְבֵן פֹּרֶה וְעוֹדֶנּוּ בְאִבּוֹ / וְאַךְ פִּרְיוֹ פְּרִי שֵׂכֶל וְדֵעָה
רְאִיתִיו עַל־יְדֵי שֵׁמַע וּמַשְׂכִּיל / יְהִי צֹפֶה בְּעֵינֵי הַשְּׁמוּעָה
תְּקַעְתִּיהוּ בְּמוֹרָשֵׁי לְבָבִי / בְּמָקוֹם נֶאֱמָן יָתֵד תְּקוּעָה
בְּחֵי הוֹרוֹ אֲנִי נִשְׁבָּע וּמִי־זֶה / אֲשֶׁר יָפֵר בְּשֵׁם אָבִיו שְׁבוּעָה
הֲכִי חֶפְצִי עֲבֹר יַמִּים אֲלֵיהֶם / וְלָלֶכֶת בְּאֶרֶץ לֹא זְרוּעָה
וְלֹא־יִרֶף שְׁאוֹן לִבִּי עֲדֵי־כִי / בְּפוּךְ עֵינָם תְּהִי עֵינִי קְרוּעָה
וְעֹז נַפְשִׁי אֲשַׁו נֶגְדָּם שְׁחוֹחַ / וְאֶת־אָזְנִי לְאַהְבָתָם רְצוּעָה
וְִיִמָּלֵא שְׂחוֹק פִּי אָז בְּהַבִּיט / לְמַרְאֵיהֶם וְשִׂפְתוֹתַי תְּרוּעָה.