לוגו
[אֲפַלֵּס מַעְגָּלַי]
פרק:
מיקום ביצירה:
0%
X
F
U

ומן כלמאתה אלוסאס וקצאידה אלג͘האר קצידה יד͘ם ّ פיהא קומא ויפתכ͘ר בנפסה [ומדבריו הנאים ומשירותיו המוכרות שירה שבה הוא מגנה אחרים ומשבח את עצמו]

È — — — — — / È — — — — — / È — — — — — / È — — — — —


אֲפַלֵּס מַעְגָּלַי / וְאֵיטִיב מַעְלָלָי / וְאֵלֶךְ-תֹּם אוּלַי / לְאֵל יֶעְרַב שִׂיחִי

וְאֶתֵּן תּוֹדָתוֹ / וְאֶשְׁמֹר תּוֹרָתוֹ / וְאֶעְמֹד בִּבְרִיתוֹ / וְאֶשְׁמֹר מַסָּחִי

וּמֵעַי אַרְתִּיחָה / וְלֵב לֹא-אַקְשִׁיחָה / בְּזִכְרוֹ אָשִׂיחָה / וְתִתְעַטֵּף רוּחִי

זְמָמִי לֹא-נִבְצַר / וְיָדִי לֹא-תִקְצַר / בְּקָרְאִי מִמֵּצַר / אֲדֹנִי מִבְטַחִי

מְגַלֶּה תוּשִׁיּוֹת / וְחֹפֵשׂ מַשְׂכִּיּוֹת / לְבָבוֹת וּכְלָיוֹת / וּמַגִּיד מַה-שֵּׂחִי

בְּאַף יִזְכֹּר רַחֵם / לְאָדָם יִנָּחֵם / אֱלֹהַי מֵרֶחֶם / וּמִבֶּטֶן גֹּחִי

וְהִצִּיל שֶׂה תֹעָה / בְּחַסְדּוֹ מֵרָעָה / וְעֵינִי מִדִּמְעָה / וְרַגְלִי מִדֶּחִי

וְהוּא יִתְמֹךְ יָדִי / וְיַכִּיר מַעְבָּדִי / וְיָכִין מִצְעָדִי / כְּמוֹ זֵרָה אָרְחִי

בְּלִבִּי אֵשׁ תִּיקַד / לְעֹל פֶּשַׁע נִשְׂקַד / וּבַצַּוָּאר נֶעְקַד / כְּהֵעָקֵד מִזְחִי

וְלִי רַעְיוֹן נִדְבָּר / יְעִירֵנִי דָבָר / לְךָ לֵבָב נִשְׁבָּר / וְנַפְשִׁי הִוָּכְחִי

וְשׁוּבִי מִגְּאוֹנֵךְ / וּמַחְשֶׁבֶת אוֹנֵךְ / וְהַטִּי אֶת-אָזְנֵךְ / וְעֵינַיִךְ פִּקְחִי

שְׁמֹר מֵחֵטְא מַשְׂכִּיל / אֲשֶׁר עָשֹׂה יַסְכִּיל / אֱלִי אִם-לֹא אַשְׂכִּיל / וְאִם-אַשְׂכִּיל פִּצְחִי

הֲלֹא נֵפֶל אֵשֶׁת / מְזֹרָה הָרֶשֶׁת / וְלָמָה עוֹד בּשֶׁת / עֲלוּמִים תִּשְׁכָּחִי

וְאַתָּה מִשְׁתּוֹלֵל / וּבָרָע מִסְתּוֹלֵל / אֱמֹר אֵיךְ תִּתְהַלֵּל / וְתֹאמַר זַךְ לִקְחִי

וְהִסְכַּנְתָּ הַסְכֵּן / לְחַשֵּׁב רַע מִכֵּן / וְהִנֵּה אַךְ עַל-כֵּן / סְבִיבֹתַי פַּחִי

לְךָ יָשֵׁן עוּרָה / וּמִשַּׁדַּי גּוּרָה / וּמִתֵּבֵל סוּרָה / וְאִם-תָּמוּת תֶּחִי

תְּפָרֶשׂ-לָךְ כַּפָּהּ / וְיוֹם תַּקְשֶׁה עָרְפָּהּ / וְתִלְטשׁ עַפְעַפָּהּ / תְּהִי מָאוֹס וּסְחִי

לְזוּת שָׂפָה הָסֵר / וְאוּלַי תִּוָּסֵר / וּמָה-אַתָּה חָסֵר / וְדֶרֶךְ אֵל נִכְחִי

וְדַרְכֵי אֵל שָׁמְרֵם / וּמִצְוֹתָיו זָכְרֵם / וְעַל-אֶצְבַּע קָשְׁרֵם / וְכָתְבֵם עַל-לוּחִי

וְשִׁפְלֵי כָל-הַיְקוּם / בְּסוֹדָם אַל-תָּקוּם / וְהַשְׁקֵט אִם-יָקוּם / בְּךָ כָּל-פִּרְחָחִי

הֱשִׁיבַנִי עַל-זֹאת / וְעָנָנִי עַזּוֹת / אֲחָזוּנִי רְגָזוֹת / וְנָחַר מַפֻּחִי

בְּקִרְבִּי חִיל כָּבֵד / יְפַלַּח הַכָּבֵד / וְתִקְוָתִי תֹאבֵד / וְלֹא-אָבַד נִצְחִי

אֲנַחְנוּ עִם-אַנְשֵׁי / זְמַנִּי הַקָּשֶׁה / כְּמִצְרִים עִם-משֶׁה / וְכַשְׂדִּים עִם-תַּרְחִי

תְּמוּנוֹת נִמְשָׁלוֹת / וְלִבּוֹת נִבְדָּלוֹת / וְאֵינָם נִקְהָלוֹת / כְּשֶׁלֶג עִם-אָחִי

הֲתִהְיֶה הַבְּרָכָה / לְעוֹלָם כִּבְרָכָה / וְאִם-צֶלֶם מִיכָה / כְּצַלְמוֹן הָאחֹחִי

וְאִם-יִהְיֶה עַמְרָם / כְּמוֹ מִשְׁפַּחַת רָם / וְאִם-יִהְיֶה אַבְרָם / אֲבִירָם הָקָּרְחִי

וְאִם-יִהְיֶה הֵידָד / אֲשֶׁר בּוֹ יוֹד כַּהְדַד / בְּלִי יוֹד אוֹ אֶלְדָּד / כְּבִלְדַּד הַשּׁוּחִי

וְחָלִילָה לִהְיוֹת / שְׁוָרִים כָּארָיוֹת / וְאֵיזֶה קַל חַיּוֹת / אֲשֶׁר יִצְעַד פִּתְחִי

מְיֻדָּעֵי זִמְרִי / וְרֵעֵי בֶן-עָמְרִי / וְשׂנְאֵי-בֶן-אוּרִי / וְאֵיתָן אֶזְרָחִי

וְלוּ יֵשׁ מִשְׁאֶלֶת / וּמָצְאוּ קֹהֶלֶת / לְחָצוּהוּ דֶלֶת / וְהִכּוּהוּ לֶחִי

בְּרִיתָם לֹא יִמּוֹט / לְשׂוֹם שֶׂכֶל שָׁמוֹט / וְעַל-כֵּן בָּם אָקוֹט / וְלֹא-אֶשְׁכַּח שַׁחִי

וּבִרְאוֹתָם אָחוּשׁ / לְקַלֵּל הַיּוֹם חוּשׁ / וְלוּ בְשָׂרִי נָחוּשׁ / וְכָאבָנִים כֹּחִי

נְפָשׁוֹת נִדְאָבוֹת / וְגַבּוֹתָם עָבוֹת / כְּגַלֵּי מַצֵּבוֹת / וְשִׂפְתֵי נַפְתֻּחִי

וְגָבְהָם כַּתִּדְהָר / וְלִבָּם אָץ נִמְהָר / כְּעַתּוּדֵי הָהָר / וְקֹטְפֵי מַלֻּחִי

כְּחֹסֶן אַלּוֹנִים / כְּקוֹמַת עַרְמוֹנִים / כְּסִירֵי סַלּוֹנִים / כְּקִמֹּשֵׂי חוֹחִי

יְשִׁיבוּן אֶת-מִלַּי / וְיָסֹבּוּ עָלַי / עֲדֵי אַשְׁלִיך כֵּלַי / וְאַשְׁלִיךְ תּוֹתָחִי

פְּנֵיהֶם נִפְעַמְתִּי / וְדוּמָם נֶאְלַמְתִּי / וְלוּ אֶרְצֶה שַׂמְתִּי / בְּאַפֵּיהֶם חַחִי

וְרִפִּיתִי קָשְׁיָם / וְרִפִּאתִי חָלְיָם / אֲבָל שַׂמְתִּים כַּיָּם / וְסִפְרִי מִזְרָחִי

הֲכִי אֵין דּוּמִיָּה / לְנֶפֶשׁ הֹמִיָּה / וְקַצְוֵי תוּשִׁיָּה / יִגֹרֵמוֹ חֹחִי

וְאָנִיף יָד רָמָה / בְּדַעַת וּמְזִמָּה / וְצִיץ נֵזֶר חָכְמָה / אֲשַׁוֶּה עַל-מִצְחִי

וְאֵלֶיהָ אֶתְאָב / וּמֵימֶיהָ אֶשְׁאָב / וְלַבִּין אֶקְרָא אָב / וְלַמּוּסָר אָחִי

וְדַרְכֵי בִין אֶצֹּר / וּבַשֵּׂכֶל אֶעְצֹר / וּמִמֶּנוּ אֶקְצֹר / שְׁחִיסִי וּסְפִיחִי

וְהוּא גַּן פַּרְדֵּסִי / וְיֵינִי וַעְסִיסִי / וְכָפְרִי וַהְדַסִּי / וְרֵיחַ נִיחֹחִי.