אַחֲרֵי סֻכְּלָה עֲצַת אֲחִיתוֹפֶל וַיִּנָּגְפוּ עַם יִשְׂרָאֵל לִפְנֵי עַבְדֵי דָוִד וַיִּנָּחֶם עַל חַטָּאתוֹ.
קַח נַפְשִׁי יָהּ! וּבִדְמִי יָמַי אֵלֵכָה,
אֵרְדָה לִשְׁאוֹל תַּחְתִּיָּה וּשְׁעָרָיו אַחֲרַי יִסָּגֵרוּ
תֶּאֱטַר עָלַי פִּיהָ בְּאֵר שַׁחַת וְתָפְתֶּה
אוּלַי לֹא יֹאחֲזֵנִי בֶּעָקֵב פִּשְׁעִי וְאִישָׁן וְאֶשְׁקוֹט.
מַה-תֶּעֱרַב שְׁנַת הַמָּוְתָה לְנֶפֶשׁ פּוֹשֵׁעַ!
פֹּה בּאֶרֶץ הַחַיִּים אַךְ קוֹל פְּחָדִים בְּאָזְנָיו
נַאֲקוֹת חָלָל יְלֵיל אַלְמָנָה וְשַׁועַת יָתוֹם יִשְׁמַע תָּמִיד
זַעֲקַת שָׁדוּד לֹא תִדְמֶה – הָגוּת לִבּוֹ תְּצִיקֵהוּ;
רֶגַע לֹא יִשְׁקוֹט לֹא יֵדַע שַׁלְוָה
עֲדָנִים זָרוּ לוֹ וְשִׂמְחָה תָּנוּס מִפָּנָיו
אָכֵן בְּבֹא יוֹמוֹ וְנַפשׁוֹ תֵּרֵד שַׁחַת
שָׁמָּה חָדַל רוֹגֶז וְשׁוֹד חָלַץ מֶנְהוּ.
קַח גַּם נַפְשִׁי יָהּ! וְשִׁיתֵנִי בּבוֹר תַּחְתִּיּוֹת
בְּעַד מקוֹר חַיַּי אַל תָּשִׂים בְּרֳיחַ וּדְלָתַיִם
יִזַּל נָא מִמַּעְיָנַי לְנַחֲלֵי בְלִיַּעַל סֶלָה!
שָׁם יִדּוֹד מְרִי שִׂיחִי וּבַמֵּתִים חָפְשִׁי אֱהִי.
אוּלָם הָהּ! אֲשּׁוּרֶנּוּ, בַּהֲגִיגִי אֶחזֶה שְׁאוֹל תַּחְתִּיָּה
אָיוֹם וְנוֹרָא הוּא, מַחֲשַׁכִּים! מְצוֹלוֹת!
מֶלֶךְ בּלָּהוֹת יֵעוֹר מִיִּרְכְּתֵי אֶרֶץ תַּחְתִּית
צוֹעֵד בְּזַעַם הִנֵּהוּ בְּאַף יִכּוֹן לִקְרָאִתי
“הוּרַד שְׁאוֹל גְּאוֹנֶךָ!” קוֹל חֲרוֹנוֹ אֶשְׁמַע,
"חֲטָאָה גְדוֹלָה תָּעִיק נַפשֶׁךָ וַתְּקַו לִשְקוֹט פֹּה?
עוּרוּ רְפָאִים כּלָּם! הִקָּבְצוּ עַתּוּדֵי אֶרֶץ!
רְאֵה אֵיךְ יִשּׂאוּ אֵימַי אֵיךְ קָדְרוּ וְשָׁחוּ
בַּעֲבוֹת חַטָּאתםָ יִמְשְׁכוּ עָמָל וְשׁוֹד עוֹלָמִים
לֹא אֶשָּׂא פְּנֵי רוֹזְנִים נָגִיד לֶעָנִי אַשְׁוֶה;
וְאַתָּה שְׁפַל בְּנֵי תְמוּתָה! טוֹרֵף אָב בְּאַפּוֹ!
אַתָּה תְּיַחֵל בְּשַׁעֲרֵי מָוֶת כִּי מְנוּחָה תְּקַדֵּם פָּנֶיךָ?"
אַלְלַי לִי כִּי רָשַׁעְתִּי! גַּם בַּשּׁחַת אֵין מִפְלָט
גַּם בְּעֶבְרֵי פִּי פַּחַת יְמִין רִשְׁעָה תֹּאחֲזֵנִי.
אַךְ מִי מִבִּלְעָדַי יַשּׁיא בִּי נָקָם וְשִׁלֵּם?
מוֹרָשֵׁי לְבָבִי מִלְּטוּ בִקֵּעוּ אֶפְעֶה, חֲמָתוֹ תַרְוֵנִי!
קָצְרוּ שְׁנוֹת עוֹלָמִים אֵין דֵּי בָם הָשֵׁב גְּמוּלִי
כִּי רַבּוּ עֲוֹנוֹתַי.